As me in Dörp óvver ut volkslied sjprikt, kumpt me al dök oet bej ‘Sjoeën Helje Dörp’ van De Bretelboys. Iddere echte Dörper kènt dèt liedje, mèr auch wiet boete Helje is dèt nummer bekènd. Eigenlik is ut un parodie op ‘Mooi Volendam’ oet 1981.

Ut volkslied ‘Heldje oos dörp’ woort in 1947 gesjreve dor Sief Frencken. Sief gebroekde ut woord ‘Heldje’. Ziene zwaoger, Will Kranen, componeerde ut sjtuk. Dèt dèt lied óngevier tachtig jaor geleje gemakt woort, is te zeen as me de tekst bekiekt. Weurd as ‘Kowberg’ en ‘beus’ waere anno 2024 neet mier gebroekt. Of misjien hej en dao nag dor unne aoje mins. Auch vèlt op dèt de tekst dudelik optimisme oetsjtraolt en gelouf in de toekomst. Kort nao de oorlog, woe de tekst auch nag nao verwiest, woort alles op alles gezat um Dörp wèr op te bouwe.
Veul minse oet Dörp lierde vreuger op sjoeël dèt Dörper volkslied. Oeëts woort ut auch gezonge bej de installatie van burgemister Hoeijmakers in 1964, en bej de eupening van ut sjwumbad in de Dörper bös. Bej vereiniginge wie Jong Nederland woort dèt leed auch gezonge. Neet allein in Dörp woort dèt lied gezonge, auch veul doezjende kilomaeters van oos dörp aaf.

DÖRPER VOLKSLIED IN BRAZILIË
Op 19 juli 1985 klonk in ut dörpke Mocajuba, gelaege aan de oevers van de rivier de Tocantins in ut Braziliaanse Amazonegebied, ut ‘Dörper volkslied’ van Sief Frencken en Will Kranen. Dèt hej te make mèt twieë Dörper missionarisse.

In mieërt 1985 waas Gerrit Frencken door de Paters Lazaristen van Noord- en Noordoost Brazilië gekoze as Provinciale Euverste. Frencken, zoon van de tekstsjriever van ut Dörper volkslied, zoe dees taak op zich neme op 19 juli van dèt jaor, umdèt dae daag de geboortedaag van Sint Vincentius is, de oprichter van de congregatie van de Lazaristen. Dèt zoe gebeure in ut dörp Mocajuba, woe de odste Nederlandse Lazarist aan ut werk waas: de in Helje-Dörp gebore en getoge Pierre Hermans. Ein van de sterke punte van Pierre waas det hae veul wis van meziek. Jaore geleje hej hae in dèt Braziliaanse dörp un echte fanfaar opgericht. Die speulde bèj veul gelegenhede, ónger angere bej precessies. ‘Padre’ Pierre sjreef un partituur van ‘Heldje’ veur un paar insjtrumente en nao dök en lang oefene heje die jonges de versjillende parteje van dees mesjien neet erg Braziliaans klinkende meziek prima onger de kneen; klaor veur de oetveuring.
Nau oetlek woe dèt lied vanaaf kwaam, weerklonk op dees maneer onger langdurig applaus ‘Heldje oos dörp’ óvver de watere van de groeëte rivier de Tocantins in het Braziliaanse Amazonegebied.

EIN OPNAME OEHT 1958 GEVONGE
D’r is lang gezoocht nao un opname van ut èrste Dörper volkslied; en d’r is ein opname gevonge die op 6 november 1958 is opgenome, ter gelegenheid van de broeleft van Harry Kranen en Lieke Gunter. Veul naefkes en nichtjes van ’t broedspaar zinge ein paar couplette. Auch weite wae dèt ierder dèt jaor de kinger die in de klas van Sief Frencken zoote, nao zaal Aerdts kwaame, woe minse van de KRO Radio waare die ein opname makde, wie de kinger ut lied ginge zinge. Of dit oeëts is oetgezonde weite wae neet. In ut omroeparchief is d’r niks euver truuk te vinge.

Bej de oetvaart van Marianne Janssen-Frencken, de innigste dochter van tekstsjriever Sief Frencken, is dèt lied veur einmalig gebroek in de kèrk opgenome. Soliste Sandra Korsten (van Kaate) zong drej van de vief couplette en ettelike kier ut refrein. Zoeë klonk op 17 november 2023 in de Sint Lambertuskèrk van Helje-Dörp opnej ut èrste Dörper volkslied.